Ang Akong Pamalandong [August 11, 2018] John 6:41-51...
19th
Sunday in Ordinary Time
Juan 6:41-51
Karong panahona, daghan ang kusog
mobagulbol tungod sa panghitabo sa atong nasud. Kung atong tanawon daghan ang
matang sa pagbagulbol. Adunay mobagulbol kay wala niya mauyoni ang usa ka
panghitabo. Makatabang kini kon ang maong pagbagulbol ipaabot didto sa
hingtungdan isip usa ka makatabang sa pagtuki.
Aduna say hangtod hungihong na lamang
nga pagbagulbol kay mahadlok man sa gibagulbolan. Susama lamang kaniadto sa
Martial Law. Tiklo dayon ka.
Adunay mga tawo usab nga bisan unsa pay
mahitabo mobagulbol gayod, kay lakip na kini sa ilang kinaiya. Kay basig
manghubag ang ilang tutunlan kon dili sila makabagulbol. Lakip niini ang mga
mobagulbol kay wala na silay makita nga maayo sa ilang kaatbang, sama sa
kinabuhi sa politika.
Ang pagbagulbol batok kang Jesus
timailhan sa walay pagtuo kaniya. “Dili ba kini si Jesus, ang anak ni Jose,
kansang amahan ug inahan atong kaila? Nganong miingon na man kini siya nga:
‘Mikanaog ako gikan sa langit’?” Kon karon pa kini, moingon gayod sila: “Wala
siya koyapi? Kaila ra ba na namo siya.”
Dili nila madawat ang iyang langitnong
kagikan: “Walay nakakita sa Amahan gawas kaniya nga gikan sa Amahan; nakita na
niya ang Amahan.”
Ang pagbagulbol adunay kalambigitan sa
gahi nga bagulbagol. Kini nagpasabot – gahi og ulo. Ang gahi og ulo dili
maantigong maminaw ug mosalig sa Dios. Tawhanong kinaiya kini nga dili tugotan
ang Dios nga magpaka-Dios, nga mobutyag sa iyang gahum. Tawhanon ra kaayo ang
sukdanan nila sa Ginoo. “Dili ba kini si Jesus, ang anak ni Jose?” Wala nila
tugoti si Jesus nga mamahimong buhing pan alang kanila.
Kon buot hunahunaon, ang pagbagulbol
diay batok kang Jesus susama ra usab sa pagbugalbogal kaniya.
Sa pinulungang Bisaya daghan kaayong
mga pulong nga pareho sa bugalbogal: tamay, yubit, biaybiay, yagayaga,
galugalo, himaraot, ayad ug uban pa. Lakip gayod kini sa atong kultura ug
usahay makaulit ug makalingaw.
Atubangan sa atong mga kalisdanan labi
na karung panahona, tugotan nato si Jesus nga magdumala sa atong kinabuhi. Ato
siyang e-sentro sa atong kinabuhi. Wala nay pagbagulbol ug pagbugalbogal,
hinoon paminawon nato siya sa dakong pagpaubos ug pagtuo. Amen…
God is love...
God bless us always...
