Ang Akong Simpling Pamalandong [August 27, 2017] - 21st Sunday in Ordinary Time: Matthew 16:13-20

21st Sunday in Ordinary Time

Ikakawhaan ug Usa nga Dominggo

Matthew 16:13-20

Sa atong Ebanghelyo karon, si Jesus nangutana sa iyang mga tinun-an, (Sumala sa mga tawo, kinsa man ang Anak sa Tawo?) “Who do people say that the Son of Man is?” Si Pedro mitubag: “Ikaw mao ang Mesiyas, ang anak sa Dios nga buhi!” Dinhi nabati nato ang pagpadayag sa personal nga pagkaila ug pagtuo ni Pedro kang Jesus.

Karong panahona, adunay nagkalaing-laing pundok sa pagtuo sa mga tawo. Kini usab sila adunay mga masulti sa ilang pagtuo bahin kang Jesus basi sa ilang nagkaling-laing personal nga kasinatian sa kinabuhi.

Ug karong adlawa ug karong taknaa, si Jesus mangutana usab kanimo o kanato; Kinsa man ako alang kanimo? “Who am I to you?” Sino nga ba ako para sa iyo?

Siguro matag-usa kanato makahulagway ug makasulti nga si Jesus: [buotan, manggihatagon, isog, malooy-on, matinud-anon, mapasayloon ug daghan pay uban…]

Kini nga mga pagpadayag nakabasi kini sa matag-adlaw natong kinabuhi diha sa atong pagtuo kaniya. Adunay mga higayon nga kita adunay mga talagsaong kasinatian sa atong pagtuo. Kung ato kining balikan ug pamalandungan pag-ayo - kini magdasig ug maglig-on kanato sa pagpadayon sa atong mga bulohaton nga maalagaron. [Tungod niini makaingon gayud kita nga adunay Dios, buhi ang atong Dios].

Karon, ang hagit kanato sa atong Ebanghelyo mao nga kining atong pagkaila ug pagtuo ni Jesus magdasig ug maglig-on unta kanato sa pagpabilin sa atong pagtuo Kaniya ug pagpadayon sa pagpaambit nato ni Jesus ngadto sa uban aron sama usab kanato mahiusa, makasinati, ug makapadayag sila kung kinsa gayod si Jesus sa ilang kinabuhi.

Ipadayon nato ang pagbasa ug pagpamalandong sa atong Biblia, magsimba kanunay labi na sa matag Dominggo ug sa mga Adlawng Iglilihi, mag-ampo kanunay, mo salmot sa GKK ug makiglambigit sa mga bulohaton sa Kapilya ug sa Parokya ug ang atong pagpakabana sa kaayohan sa tanan lagi na gayud sa mga kabus. Amen…

God is Love...

God bless us...