Ang Akong Pamalandong [June 03, 2018] Mark 14:12-16, 22-26...
Feast of the
CORPUS CHRISTI
Mark 14:12-16, 22-26
Karon mao ang Solemnidad Sa Mahal nga Lawas ug Dugo ni Cristo
[Feast of the CORPUS CHRISTI].
Ang hunahuna sa mga Judio nakasentro
gayod sa pagkaon sa unod ug pag-inom sa dugo sa Anak sa Tawo. Alang kanila usa
kini ka “cannibalism” – [the usually ritualistic eating of human
flesh by a human being or eating of the flesh of an animal by another animal of
the same kind – Merriam-Webster Dictionary].
Ug diha sa Genesis 9:4, ang Ginoo
nagdili kanila sa pag-inom og dugo. Mao ng wala gayod sila makasabot sa gisulti
ni Jesus ug dili gayud sila makadawat niini.
Apan ang gipadayag ni Jesus dinhi,
nakasentro sa misteryo sa Yukaristiya. Ang iyang kinabuhi mamahimong sakripisyo
diha sa altar ug sa krus. Si bisan kinsa nga moambit sa lawas ug dugo ni Jesus
mahiusa uban kaniya. Kitang tanan
makaangkon sa kaluwasan. Makadawat kita sa kapasayloan sa atong mga sala. Madawat nato ang kahingpitan sa kinabuhi. Ug
madawat nato ang gisaad nga kinabuhing dayon.
Kung ang Dios naghatag og pagkaon sa
mga tanom ug mga kahayopan, labi na gayod sa tawo nga iyang gihigugma pag-ayo.
Kung ang Dios naghatag og kinabuhi sa mga tanom ug mga kahayopan, labi na gayod
sa tawo nga iyang pinangga. Kung ang Dios sa natural nga pamaagi sa mga butang
mihatag og pagkaon, sa mga tanom ug mga kahayopan, labi na gayod diha sa
talagsaong pamaagi sa mga butang, makahatag siya kanato og labaw pa sa
pagkaon.
Tinuod gayod nga ang Dios mohatag og
makaayo kanato aron kita molahutay. Mohatag siya kanato og pagkaon nga
molungtad ug magdala kanato ngadto sa kinabuhing dayon. Pinaagi niini ang Dios mihatag kanato sa
iyang bugtong Anak nga si Jesus, ang Pan sa Kinabuhi. Ug si Jesus miingon sa
atong Ebanghelyo: “Kay ang akong unod mao ang matuod nga kalan-on,
ug ang akong dugo mao ang matuod nga ilimnon.”
Karon, ang atong pakighiusa kang
Jesus magdala kanato ngadto sa matuod nga pakighiusa kaniya ug kanunay ana siya
uban kanato.
Karon, ang atong pagpangalawat
magdala ug maghimo unta kanato nga maghunahuna sama ni Jesus, mo sulti sama ni
Jesus ug mobuhat sama ni Jesus. Sa ato pa, ang kanunay natong pagpangalawat
magdala ug maghimo unta nato nga sama ni Jesus. Gusto nato o dili? Amen…
- Gitahod ba nato ang Santos nga
Misa?
- Kinasingkasing ba natong gidawat
ang lawas ug dugo ni Kristo?
- Andam ba kita nga modala ni Kristo ngadto sa uban?
God is love...
God bless us always...
