Ang Akong Pamalandong [March 18, 2018] John 12:20-33...

5^th Sunday of Lent

Juan 12:20-33

Ang atong Ebanghelyo karon naghulagway og duha ka pagtulon-an:

Una, “Ang usa ka lugas trigo magapabilin nga usa ra gayod ka lugas gawas kon kini ipugas sa yuta ug mamatay. Kon kini mamatay, mamunga kinig daghan.” (Falling, Dying, Sprouting, Growing and Bearing).

Una sa tanan, ang maong panultihon nagtudlo sa umaabot nga pagpasakit, kamatayon, ug pagkabanhaw ni Kristo, nga maoy nagdala’g kaluwasan sa tanang mga tawo. Ang iyang pagkamasinugtanon ug pagsakripisyo naghatag kanato og kagawasan ug bag-ong kinabuhi. Ikaduha, ang maong panultihon nagdapit sa mga tinun-an sa pagpuyo og kinabuhi nga Kristohanon - makamaong magsakripisyo ug andam magpakamatay alang sa kaayohan sa uban. Kini usa ka paagi sa paghikalimot sa kaugalingon nga, matod ni Kristo, maoy maghatag kanato’g tinuod ug makahuloganong kinabuhi karon ug sa umaabot.

Ikaduha, “Ang mahigugma sa iyang kinabuhi mawad-an hinuon niini. Apan ang magsalikway sa iyang kinabuhi niining kalibutana, makabaton sa kinabuhi nga walay katapusan."

Pinaagi niining mga pulonga, gitudloan kita ni Jesus sa matang sa kinabuhi nga angay natong puy-an. Kini nagpasabot nga dili kita maghinakog o maghunahuna sa kaugalingong kaayohan ug kabulahanan lamang. Kay kon ingon kita niini, wala nay ganahan makig-uban kanato ug mawad-an og kahulogan ang atong kinabuhi.

Ang usa ka sumusunod ni Jesus kinahanglan makamao malimot sa kaugalingong kailibgon, magmanggihatagon ug magsakripisyo alang sa kaayohan sa uban.

Pinaagi niini, maghatag siya og kinabuhi diha sa katilingban ug maiya ang kalipay nga tinuod karon ug sa umaabot. Amen…

God is love...

God bless us always...