Ang Akong Pamalandong [March 04, 2018] John 2:13-35...

  3rd SUNDAY OF LENT

Ikatulong Domingo sa Kwaresma

John 2:13-35

Sa atong Ebangheyo karon, gihulagway ang pagkatawhanon ni Jesus. Nalain, naglagot ug nasuko siya sa nakita niya sa templo. Siya miingon, “dad-a sila sa gawas, ayaw ninyo himoang merkado ang balay sa akong Amahan.”

Ang paghinlo sa templo ni Jesus naghatag kanato og tulo ka pagtulon-an karon.

Una, ang pagsimba kinahanglan nga buhaton ug saulogon diha sa tim-os ug lawum nga pagtahod. Ang atong pagsalmot ug paglihok sa mga bulohaton sa Simbahan kinahanglan buhaton nato kini nga adunay dakong pagrespeto. Ang balay sa Dios dili gayod nato bugalbulan ug binuangan. Mangadto kita sa Simbahan o manimba kita aron sa pagsalmot sa selebrasyon sa mga Sacramento, dili aron pagstoryahanay, pagtsismis, ug pagpakita sa atong mga nindot nga bisti ug mga alahas. Mangadto kita sa Simbahan o manimba kita aron sa pag-ampo sa Dios ug mosalmot sa mga relihiyosong mga bulohaton uban sa usa ka Kristohanong katilingban. [Story: Focus]…

Ikaduha, ang gusto ni Jesus mao ang pagbuhat sa kalooy dili ang pagsakripisyo. Ang paghalad og mga hayop isip usa ka sakripisyo dili baylo sa pagbuhat og kalooy ug mga maayong butang. Ang paghigugma ug pagpasaylo mas importante pa kay sa mga ritual sa simbahan. Ug ang mga buhat nga maayo dili kabayloan og mga relihiyosong seremonyas. Sa ato pa ipakita nato diha sa konkreto nga mga binuhatan.

Ikatulo, si Jesus maoy una, labaw ug sentro sa simbahan. Kinahanglan nga si Jesus maoy una, pinakataas, ug sentro nga atong simbahon. Siya ang himoon natong sentro sa tibuok natong kinabuhi. Ug atong hinumduman, nga ang Dios anaa sa matag-usa kanato.

Diha sa atong pagkabinunyagan, nahinloan kita sa atong mga sala. Nahimo kitang temple sa Dios. Nahimo kitang katawhan sa Dios. Apan ang sala maoy permi makapadaot kanato sa atong relasyon diha sa Dios. Kinahanglan nga mahinloan kita sa mga sala pinaagi sa atong mga pagpaningkamot nga malikayan ang pagka makaugalingon, dautang mga binuhatan ug uban pa.

Karong panahon sa kwaresma, “ang atong paghinulsol ug pagbag-o maoy makapahiuli kanato pag-usab nga mga tinuod nga templo sa Dios.” Amen…

God is love...

God bless us always...