Ang Akong Simpling Pamalandong [February 18, 2018] Mark 1:12-15...

1^st Sunday of Lent

Marcos 1:12-15

Basi sa atong kasinatian daghan sa atong mga igsoon nga sa kanunay moingon kanato: “Ayaw baya patintal ha.” O “Ayaw lang gyud patintal.”

Nasayod kita nga sayon lang kini isulti, apan lisud buhaton. Ang yawa makamao mogamit og panagway nga maanyag ug mga butang nga makasilaw nga maoy makapadani ug makapatintal kanato.

Sa atong kasinatian, dili sayon ang pagbalibad sa mga tintasyon ni Satanas. Apan, ang maayong balita sa Ebanghelyo nato karon mao kini: Si Cristo nagmadaogon batok sa mga tintasyon sa yawa ug tungod niini kita nahatagan og dakong kadasig ug kalig-on. Uban ni Cristo, aduna kitay katakos nga modumili sa mga pagdani sa daotan.

Niining panahon sa kwaresma:

Una, moduol kita sa sakramento sa pagkumpisal ug ihalad nato ang atong mga sala ngadto sa Dios.

Ikaduha, mag-ampo ug mosimba kita alang sa kaayohan sa atong kaugalingon ug sa usag-usa.

Ikatulo, magsakripisyo ug motabang kita alang sa kaayohan sa atong banay ug sa uban.

Pinaagi niini, madawat nato ang grasya nga mao unyay atong gamiton sa pagpakigbatok sa yawa. Amen…

God is love...

God bless us always...