Ang Akong Simpling Pamalandong [February 14, 2018] Matthew 6:1-6; 16-18...

ASH WEDNESDAY

Miyerkoles sa Badlis

Matthew 6:1-6; 16-18

Karong adlawa mao ang Miyerkoles sa Badlis. Ang unang adlaw sa panahon sa kwaresma. Pagasugdan nato kini sa pagbutang og abo pinaagi sa timaan sa Krus sa atong agtang. Ug ang pari moingon kanato, “Hinumdomi, tawo, nga ikaw abog ug sa abog ikaw mobalik,” O mosulti siya kanato sa pulong nga usa ka hagit , ‘Paghinulsol ug tuo sa Ebanghelyo.’

Karon, nganong magbutang man kita og abo pinaagi sa timaan sa krus sa atong agtang? Aron kita makahinumdom og duha ka butang nga mahinungdanon kaayo sa atong kinabuhi.

Una, mga binuhat kita sa Dios. Gikan kita sa Dios. Himoon gayod nato nga sentro ang Dios sa atong kinabuhi. Ang atong kinabuhi nagsugod kaniya, kinahanglan usab nga ang atong kinabuhi matapos diha kaniya.

Ikaduha, ang abo itom kaayo. Makamansa kini. Hugaw kini. Ang sala usa ka mansa sa atong kinabuhi. Mao kini ang makahugaw sa atong relasyon sa Dios. Pinaagi diha sa atong pagpabadlis, hinaot unta nga magdala kini kanato sa paghinulsol.

Karon, unsa may atong buhaton?

Atong hinumduman ang tulo ka mga buluhaton nga makuha nato sa tulo ka mga litra sa pulong ASH. Una, A is for alms giving (pagbuhat sa kalooy). Ikaduha, S is for sacrifices (pagsakripisyo, pagpuasa ug pagpugong). Ikatulo, H is for holiness (pagbalaan o pag-ampo, pagsimba). Buhaton nato kini karon ug hangtod sa kahangturan. Amen…

God is love...

God bless us always...