Ang Akong Simpling Pamalandong [February 04, 2018] Mark 1:29-39...

5^th SUNDAY IN ORDINARY TIME

Mark 1:29-39

Adunay duha ka garantiya alang kanato ang atong Ebanghelyo karong adlawa.

Una, PANGGAON UG DILI PASAGDAN NI JESUS ANG ATONG MGA MINAHAL SA KINABUHI. Sa atong pagsakripisyo sa atong mga minahal sa kinabuhi alang Kaniya ug sa pagbiya sa hiyahay nga kinabuhi  aron kita makapangalagad sa Dios, sa paghatag nato sa tibuok natong kinabuhi alang sa iyang misyon, si Jesus mohimo gayod og mga maayong butang,  nga kita makabenipisyo niini ug mapanalanginan.  Kini iyang gipamatud-an sa iyang pag-ayo sa ugangang babaye ni Simon Pedro.

Tungod niini, unsa may atong kinaiya nga ipakita ngadto kang Jesus? Sa atong Ebanghelyo karon gihulagway nga gihuwasan sa hilanat ang ugangang babaye ni Simon Pedro ug unya misilbi siya kanila. Kini nagpasabot nga gisilbihan niya sila. Iyang gigamit ang iyang kaayohan ug ang iyang bag-ong kusog pinaagi diha sa pagsilbi o pag-atiman.  Ang ugangang babaye ni Simon Pedro naluwas ug naayo aron makatabang usab siya sa uban.

Si Jesus motabang kanato aron usab kita makatabang sa uban. Ayuhon kita ni Jesus aron usab makaayo kita sa uban. Ayuhon kita niya aron kita makaatiman sa uban.  Kining atong mga naangkon karon nga mga kaayohan, kalampusan ug grasya, kini wala magpasabot nga kini ato-a lang kondili alang usab kini sa uban pinaagi diha sa atong pagtabang ug pagpaambit niini kanila.   

Ang ugangang babaye ni Simon Pedro nagpakita sa iyang pagpasalamat kang Jesus pinaagi diha sa iyang pagsilbi kanila.  Tungod niini ipakita usab nato ang atong pagpasalamat sa Dios sa tanang mga kaayohan ug grasya nga naangkon nato Kaniya pinaagi sa pagpaambit niini sa uban ug pagpangalagad kanila.

Ikaduha, SI JESUS ANAA UG ANDAM KANUNAY ALANG SA TANAN. Si Jesus alang sa tanan. Buhaton ni Jesus ang tanan alang kanato. Kanunay siyang nagatabang ug nagaayo sa mga tawo.  Ang atong Ebanghelyo miingon: “Giayo ni Jesus ang daghang mga tawo nga nag-antos sa nagkalainlaing mga sakit, ug iyang gipagula ang daghang mga yawa gikan sa mga giyawaan.” 

Si Jesus anaa kanunay uban kanato. Atong hinumdoman kanunay nga si Jesus dili mohunong sa pagtawag ug pagtabang kanato hangtod nga kita mahiusa uban Kaniya. Amen…

God is love...

God bless us...