Ang Akong Simpling Pamalandong [January 28, 2018] Mark 1:21-28...

4^th Sunday in Ordinary Time

Mark 1:21-28

Sa unang bahin sa atong Ebanghelyo, si Jesus nagpakita og kaayohan. Anaa kaniya ang pagpakabana. Wala kaniya ang paguba o pagdaot sa tawo. Kondili anaa kaniya ang pagluwas sa tawo nga giyawaan.

Dinhi mabati nato nga ang gusto ni Jesus mao ang kumpleto nga kaayohan sa tawo. Ang tawo wala niya gisalikway, wala niya gihukman – “nga basin nagpuyo siya sa immoral nga kinabuhi mao ng ingon ana ang iyang nahiaaguman karon, giyawaan siya.” Jesus was compassionate to the possessed man.

Ang nakita ni Jesus sa tawo nga giyawaan dili mao ang iyang pagkamakasasala, dili ang iyang kanhi nga mga binuhatan. Hinoon, gidawat siya ni Jesus nga tawo nga nagkinahanglan og tabang, kaayohan, ug kaluwasan. Pinaagi niini adunay milagro nga nahitabo. Na angkon niya ang kaayohan. Giayo siya ni Jesus.

Sa ikaduhang bahin, gipahilom ni Jesus ang yawa. “Hilom ug gawas nianang tawhana.” Dili gusto ni Jesus nga mailhan ug mahibaw-an kung kinsa siya. Ngano man? Kay dili gusto ni Jesus nga mailhan siya nga usa ka tawo nga mobuhat og milagro kay tungod niini ang mga tawo magsunod-sunod man kaniya [tungod sa milagro]. Gusto ni Jesus nga ang mga tawo mosunod kaniya tungod sa ilang PAGTUO. Gusto niya nga ang mga tawo mo uban kaniya tungod sa ilang paghiGUGMA kaniya.   He desired that people approach him because of their LOVE for him.

Karon, sa kapanahonan sa atong kinabuhi, si Jesus nagsulti usab kanato nga mo – HILOM… Kini nagpasabot nga sakto na ang pagsigeg Storya, sakto na ang pagsigeg Saad, sakto na ang pagsigeg Pasumangil. Ang gusto ni Jesus kanato mao ang atong GUGMA, PAGBAG-O, ug KONKRETO NGA MGA MAAYONG BUHAT.

Mo HILOM na kita, dili nata mag-away, dili nata magtinukloray, dili nata magdinautay ni magpakitang-tao, dili nata magsigeg panaway. Ang pangutana karon, naa na ba kitay nahimo nga nakaayo sa atong isigkatawo?

Karon, giawhag kita ni Jesus sa pagpakabana ug pagkamapinanggaon sa atong isigkaingon. Ug labaw sa tanan ania kita karon dinhi tungod sa atong dakong pagtuo ug paghigugma kaniya. Amen…

God is love...

God bless us always...