Ang Akong Simpling Pamalandong [November 26, 2017] Matthew 25:31-46...

Solemnidad sa pagkaHari ni Kristo

KRISTO, HARI

Matthew 25:31-46

Karon adlawa gisaulog nato ang solemnidad ni Kristo, ang Hari. Ato kining gisaulog sa katapusan nga domingo sa atong liturhiya. Sunod domingo magsugod na ang unang domingo sa adbiyento.

Kaniadto walay laing taas nga titulo nga mapasidunggan ang usa ka tawo gawas lamang sa pagtawag kaniya nga “Hari.” Apan ang pulong nga Hari dili igo nga atong itawag ug ihulagway kung kinsa gayud si Kristo.

Aduna akoy pangutana: Unsa man nga matang sa pangulo ang atong pili-on ug sundon karong panahona?

Sa pagpangutana ni Pilato kang Hesus, “Ikaw ba ang hari sa mga Hudiyo?”, siya mitubag, “Ang akong gingharian wala dinhi sa kalibutan.”

Sa pag-ingon niini, gipasabot ni Hesus kang Pilato nga ang iyang pagkahari dili kalibutanon.

Dili siya sama ni Caesar, ang hari nga gisilbihan ni Pilato nga igo lamang magmando ug magpaserbisyo.

Ang pagkahari ni Kristo lahi tungod kay kini inubanan sa dakong gugma, kamaalagaron, paghatag sa kaugalingon ug pagsakripisyo dili lamang sa usa katawo kondili sa tanan niyang kabuhatan.

Daghan na ang nanglabayng eleksyon apan nakapili bakitag mga tawo nga sama ni Kristo?

Sa sunod eleksyon, makamao unta kitang mopili og mga tawo nga sama kang Kristo mangulo pinaagi sa matinud-anong pag-alagad.

Dili unta kita makapili og mga tawo nga walay kahadlok sa Dios, kurakot, kawatan, walay pagtahod sa kinabuhi, ug mapahimuslanon.

Karon, atong ihalad sa atong talagsaon nga Hari ang atong mga katuyoan. Ug atong siyang dawaton ug esentro sa atong tibuok kinabuhi. Ug atong bag-ohon ang atong mga panaad Kaniya aron kita angayan nga mo puyo sa iyang gingharian. 

Paharion unta nato si Kristo sa atong hunahuna, ug kasingkasing. Barugan ug tumanon unta nato ang Iyang mando dinhi sa kalibutan. Amen…

God is love...

God bless us...