Ang Akong Simpling Pamalandong [November 19, 2017] Matthew 25:14-30...

33^rd SUNDAY IN ORDINARY TIME

Matthew 25:14-30

Aduna akoy tulo ka pangutana alang kanato nga atong pamalandungan karong adlawa:

1]. Unsa may masulti nato bahin sa agalon nga gihulagway ni Jesus sa Sambingay?

Dinhi makita nato nga ang Agalon nagpakita og dakong pagsalig sa iyang mga sulugoon. Ang Agalon adunay pagtuo kanila nga sila isip iyang mga sulugoon makahimo sa pagpahigayon sa iyang gipiyal nga mga dagkong responsibilidad. Sa iyang pagdawat kanila nga masaligon, gihatagan sila og kwarta sigon sa ilang kapasidad ug mga talento nga anaa kanila. Wala siya mangayo kanila og bisan unsang kondisyon. Gihatagan sila nga libre aron sa pagpalambo niini ug unsay pamaagi nga nindot aron kini modaghan. Misalig ang Agalon sa ilang pagkamadasigon ug sa ilang pagkaresponsabli. Nasayod siya nga makahimo sila sa tanan.

2]. Unsa may masulti nato bahin sa gihatag nga puhonan, o salapi, o kwarta o gasa?

Sa sambingay, ang mga sulugoon gihatagan og kwarta basi sa ilang abilidad.  Bisan dili pareho ang kantidad nga ilang naangkon apan pareho ang oportunidad nga ilang nadawat.

Sama sa mga sulugoon, kinahanglan nga kita motrabaho ug makahatag og kabahinan sa gipiyal kanato. Dili nato sayangon ang gihatag sa Dios kanato nga mga gasa, ato kining palambuon ug pabungahon. Ug labaw sa tanan ato kining gamiton alang sa Iyang kahimayaan ug ipaambit diha sa pagpangalagad sa atong mga kaigsoonan.

We must not keep them only for ourselves. Remember that there will be a time for an accounting before God.

3]. Unsa may masulti nato bahin sa mga sulugoon?

Ang duha ka mga sulugoon napamatud-an nga sila kasaligan ug responsible. Ilang gihatagan og bili ang gisalig kanila. Sa laing bahin ang ikatulo nga sulugoon, nagpaila nga dili siya angayan nga saligan sa iyang agalon. Nanigurado siya sa iyang kaugalingon, dili lamang siya tapulan kondili talawan, mahadlok siya nga mo risgo sa iyang kinabuhi. Naglikay siyag responsibilidad aron makalikay sa dakong tulobagon. Wala siyay gihimo sa gasa nga gihatag sa Dios kaniya.

Alang sa Dios, ang mahinungdanon dili ang kadako sa gasa kondili kung giunsa kini paggamit sa tawo ang gasa nga gihatag sa Dios kaniya.

Dili man kita pareho-pareho og gasa o talento apan pareho ang gihatag kanato nga oportunidad aron mapalambo nato kini pinaagi sa atong mga pagpaningkamot ug diskarte sa kinabuhi. 

For God, what is important is that we try, we are faithful, and we do our very best. Amen…

God is love...

God bless us...