Ang Akong Simpling Pamalandong [December 03, 2017] Mark 13:33-37...

1^st Sunday of Advent

Marcos 13:33-37

Sa unang bahin, karung adlawa gisaulog nato ang Unang Domingo sa Adbiyento, og kini adunay duha ka mahinongdanon nga butang nga atong gihandom ug gihatagan og bili.

Una, mao ang pagsaulog, pagpangandam ug paghandom sa Pasko sa dihang mianhi si Cristo kanato sa unang higayon.

Ikaduha, pinaagi sa unang handumanan ato ng gisentro ang atong hunahuna ug kasingkasing sa pagpangandam ug paghulat sa ikaduhang pag-abot ni Cristo sa katapusan sa panahon.

Unsa man ang panawagan sa Panahon sa Adbyento?

Labing siguro, ang pag-abot ni Jesus sa katapusan sa panahon ubanan gihapon sa dakong misteryo.

Sa ato pa dili nato kini mahibaloan, dili kini nato matagnaan ug dili kini nato matugkad. Kini nagpasabot nga wala gayoy usa kanato nga nasayod sa ikaduhang pagbalik ni Jesus.

Kon dili kita magmabinantayon, maabtan kita sa Dios nga dili andam, sama sa katawhan sa Israel niadtong unang pasko.

Nan, unsa may angay natong buhaton?

Kini ang pahimangno sa ebanghelyo: “Pangbantay kamo!”

Mao kini ang tawag sa Adbyento:

Magbantay kita ug andamon nato  ang atong kaugalingon sa pag-abot sa Ginoo pinaagi sa pagtul-id sa atong kinabuhi, pagbiya sa sala, ug sa pagpalambo sa gugma sa usag-usa.

Sa matag adlaw buhaton nato ang pinakamaayo sa atong kinabuhi ug sa atong isigkatawo. Amen…

God is love...

God bless us...