Ang Akong Simpling Pamalandong [October 8, 2017] Matthew 21:33-43...

27^th SUNDAY IN ORDINARY TIME

Matthew 21:33-43

Ang tanan nga ania dinhi sa kalibutan ang Ginoo maoy sinugdanan ug gigikanan. Gihimo niya ang tanan alang sa ikaayo ug ikalambo sa tanan niyang ginsakopan. Ang Ginoo, maayo gayud ug manggihatagon sa tanan…

Ang atong Ebanghelyo karon, nagtudlo kanato mahitungod sa atong kaugalingon ug unsaon nato pagbarog ug pagpabilin diha sa Ginoo.

Dinhi atong makita ang prebilihiyo sa tawo [human Privilege]. Sama sa tag-iya sa saupan, ang tanan nga ania kanato usa ka prebilihiyo, dili premyo. Mao ni ginaingon nato nga ang tanan Grasya sa Ginoo.

Ang Grasya dili premyo kondili prebilihiyo sa tanan. Ang kinabuhi mismo usa ka prebilihiyo - nga wala kita masayod nga kuhaon kini kanato sa bisan unsang orasa.

Ang prebilihiyo anaa gayud kini apan nagkinahanglan kini og responsibilidad.

Atong hinomduman nga aduna gayud kitay dakong responsibilidad sa Dios sa paggamit o pag-abusar sa tanang prebilihiyo nga Iyang gihatag kanato.

Gihatag sa Dios ang tanan kanato aron atong magamit ug mapahimuslan ang tanan natong prebilihiyo, apan ato man hinoon kining giguba ug giabusaran.

Usabon nato ang atong panglantaw sa kinabuhi. Kung gusto nato molambo, dili unta nato hikalimtan ang uban. Mo lantaw kita dili lang sa atong kaayohan kondili kaayohan sa tanan.

Karon, atong pangayoon sa Ginoo ang kaalam ug kalig-on nga dili nato abusaran ang mga prebilihyo nga atong naangkon, hinoon ato kining palamboon ug ipaambit nga ang tanan makapahimulos niini gikan sa pinakaubos. Ug pinaagi niini atong mapamatud-an ang atong pagkamatinud-anon diha Kaniya isip iyang mga piniyalang saop. Amen…

God is love...

God bless us...