Ang Akong Simpling Pamalandong [November 12, 2017] Matthew 25:1-13...

32^nd Sunday in Ordinary Time

MATEO 25:1-13

Ang sumada sa atong Ebanghelyo karon nakasentro mahitungod sa pagpangandam [paghanda, preparedness]. Unsa may atong andamon? Unsa nga klase sa pagpangandam ang atong pagahimoon? Adunay daghang klase sa pagpangandam.

Una, ang pagpangandam kung aduna kitay bisita nga mo abot sa atong panimalay. Pananglitan isa sa igsoon sa atong Nanay o Mama mo abot sa atong panimalay, tungod kay nakahibalo kita sa iyang pag-abot makapangandam gayud kita.

Ikaduha, panahon sa kapistahan. Kay nasayod kita sa adlaw sa kapistahan sa atong parokya o sa atong lugar, kasayod natang daan unsay angay natong adamon. Layo palang gani, nagbuhi natag baboy aron ihawon ug lechonon pag-abot sa kapistahan. Ug daghan pay uban sa klase sa pagpangandam.

Karon, ang gihulagway sa atong Ebanghelyo nga bahin sa pagpangandam mao ang pag-abot sa atong Ginoo. Bahin niini wala kita masayod. Apan daghan ang nagpatuo-tuo sa mga naglabayng panahon nga mo abot na ang Ginoo, pero hangtud karon wala pa gihapon. Kini nagpasabot nga walay bisan isa kanato nga nasayod bahin niini.

Nan, unsaon man nato pagpangandam ug unsa man ang atong pagahimoon alang sa pag-abot sa Ginoo? Ang Sambingay sa Napulo ka mga Dalaga adunay tubag niini.

Si Kristo mao ang pamanhonon; ang Simbahan mao ang pangasaw-onon. Ang pag-abot sa kaslonon posible nga malangan; apan kita, nga mga dinapit sa kasal, kinahanglan nga kanunay'ng andam. 

Ang lampara maoy simbolo sa atong pagtoo; samtang ang lana maoy simbolo sa atong mga maayong buhat.

Ang pagtoo nga walay buhat usa ka patay'ng pagtoo, sama nga ang lampara nga walay lana dili makasiga.

Aron maandam kita sa pag-abot sa Ginoo, atong sundon ang mga maalamong dalaga diha sa sambingay. Bisan nalangan pag-abot ang pamanhonon, ang mga maalamong dalaga wala magproblema tungod kay daghan sila’g dala nga lana.

Sa samang paagi, atong padaghanon ang atong dalang lana, nga sa laing pagkasulti, ang atong mga maayong buhat, aron sa pag-abot ni Kristo maabtan kita nga may igong kahayag.

Adunay nindot nga panultihon nga naga-ingon: “A drop of good deed can become an ocean if you do it constantly.” Amen…

God is love...

God bless us...

Note: I got the 2nd part of my reflections from Bishop Abet Uy...