Ang Akong Simpling Pamalandong [October 22, 2017] Matthew 22:15-21...
29th SUNDAY IN ORDINARY TIME
Matthew 22:15-21
Ang atong Ebanghelyo karon naghulagway sa mga Pariseo nga naglaraw
sa pagbitik kang Jesus pinaagi og pangutana, “Supak ba sa atong Balaod ang
pagbayad og buhis ngadto sa Emperador sa Roma, o dili ba?” Usa kini ka
pangutana aron sa pagbitik kaniya. Kung si Jesus mitubag nga ‘Oo’ kini
magpasabot nga dapig siya sa mga Romanhon. Apan kung si Jesus mitubag nga
‘Dili’ pasanginlan usab siya nga nagrebelde sa mga kadagkoan.
Si Jesus nangutana usab kanila pinaagi sa pagpangutana sa paggamit
sa kwarta nga adunay nawong ug pangalan nga nakaukit niini sa Emperador. Ug
mitubag siya, “Kon mao kana, ihatag ngadto sa Emperador ang iya sa Emperador,
ug ngadto sa Dios ang iya sa Dios.”
Kining tubag ni Jesus naghulagway sa sakto nga relasyon sa
Simbahan ug sa Panggamhanan. Kini nagpasabot nga ang kalibutanon nga mga
panginahanglan sa mga tawo mao ang sentro sa Panggamhanan ug ang spirituhanon
nga panginahanglan sa mga tawo mao usab ang sentro sa Simbahan.
Dinhi makita nato nga si Jesus wala magtudlo nga magkompetensiya
ang Simbahan ug Panggamhanan. Hinoon dinhi gihuptan ni Jesus ang pagkalabaw sa
Dios sa tanan. Ug dinhi si Jesus wala mo ingon nga adunay mga butang nga iyaha
sa Emperador. Gidawat ni Jesus nga adunay uban nga mga butang nga alang sa
Emperador apan dili siya mo uyon nga adunay uban nga mga butang nga alang lang
sa Emperador, ug dili alang sa Dios. Ang
tanan nagikan sa Dios ug iyaha sa Dios ang tanan.
Diha sa mga mata ni Kristo, sakto nga motuman kita sa Emperador,
mo respeto kaniya ug mo bayad kita sa buhis kaniya. Apan dili nato himoon nga
ang Emperador pareho ra sa Dios. “The emperor must not be considered equal to
God.” Mas tumanon nato ang Dios kay sa Emperador. Kung kinahanglan nga
dili tumanon ang Emperador aron magpabilin nga magmatinud-anon kita sa Dios,
kinahanglan gayod nga dili tumanon ang Emperador. Mas labaw ang Dios sa tanan.
Karon, bahin ani nga isyu, ang uban sa atong mga nangulo sa atong
panggamhanan natintal sa pagpugos ug pagdani sa pagkamatinud-anon sa mga tawo
nga kini iyaha man unta sa Dios. Kung
ingon ana sila, dili nato sila sundon o tumanon. Atong ihatag ngadto sa
Emperador ang iya sa Emperador, ug ang tanan ngadto sa Dios ang iya sa Dios, ug
kini nagpasabot nga ang tanan atong ihatag Kaniya. Ang atong pagkamatinud-anon sa atong pangulo
mahuman o maputol kini kon kini sukwahi na sa atong pagkamatinud-anon sa Dios.
Kinahanglan nga wala gayoy karibal ang Dios sa atong kinabuhi. Amen…
God is love...
God bless us...
