Ang Akong Simpling Pamalandong [September 3, 2017] - 22nd Sunday in Ordinary Time: Matthew 16:21-27



22nd SUNDAY IN ORDINARY TIME
Ikakawhaag-duha nga Domingo

Matthew 16:21-27


Ang pagsunod kang Kristo dili sayon, daghang tunok ang dalan nga agian mo. Puno sa pagsulay, kasakit, pag-antos, ug pagsakripisyo. Apan dinhi nato mabati ang tinuoray nga kalipay ug kahulogan sa atong kinabuhi.

Ang Atong Ebanghelyo karon naghagit kanato sa pagsunod kang Kristo. Ug adunay tulo ka kondisyon ang pagsunod Kaniya.

Una, hikalimtan niya ang iyang kaugalingon [to deny oneself]

Kini nagpasabot nga atong himoon nga sentro si Jesus. Kinahanglan nga Siya ang atong paharion sa atong kasingkasing ug sa atong kinabui. Si Jesus kinahanglan maoy una diha sa tanan natong pagabuhaton. Kini usab nagpasabot sa pagdisiplina sa atong mga personal nga gusto sa atong kinabuhi. Ug atong dawaton ug tumanon ang gusto ug plano sa Dios kanato.

Lisud, apan mahimo nato kini pinaagi diha sa pagpaningkamot uban sa grasya sa Dios…

Ikaduha, pas-anon niya ang iyang krus [to take up his cross].  

Kini nagpasabot nga andam kanunay sa pag-atubang sa mga kalisdanan ug pagsakripisyo alang kang Kristo ug sa iyang misyon dinhi sa kalibutan. Kinahanglan nga kita andam sa pagpuyo kanunay sa iyang kinabuhi. Ug sa pagsunod kaniya ug sa paghatag sa atong kaugalingon aron sa pag-ugmad sa iyang parasan. Ang pagpas-an sa iyang krus nagpasabot usab sa paghalad sa atong kinatibuk-ang kinabuhi kaniya diha sa pagpangalagad sa uban. Andam kanunay sa pagpangalagad bisan diha sa pagsakripisyo sa kabag-ohan ug kaayohan sa atong isigkatawo. Andam mo alim sa mga samad sa uban, motabang, ug mopasaylo. Atong timan-an nga ang krus ni Jesus mao ang atong kaluwasan. Pinaagi sa pagpas-an sa iyang krus, kita usab mamahimong instrumento sa kaluwasan sa uban.

Lisud, apan mahimo nato kini pinaagi diha sa pagpaningkamot uban sa grasya sa Dios…

Ikatulo, ang pagsunod kaniya [to follow him].  

Kini nagpasabot sa paghatag sa atong kinatibok-an nga pagtuman sa iyang mga kasugoan. Pagsentro sa atong mga bulohaton ug misyon kaniya. Kinahanglan nga magkinabuhi kitag sama kaniya. Mobuhat og mga butang nga makapahimoot sa Amahan. Mamahimong ehemplo sa kaayohan, hustisya, kahiusahan ug kalinaw. Mo sulti sa kamatuoran. Dili mahadlok sa pagbadlong sa sakto nga pagpuyo. Ug pagpangga sa tanan nga gipiyal niya kanato.


Kining tanan isalig nato kaniya bisan sa kalisud inubanan sa atong mga pagpaningkamot uban sa iyang grasya. Amen…

God is Love...

God bless us...
Powered by Blogger.