Ang Akong Simpling Pamalandong [January 21, 2018] Mark 10:13-16 ...
SPECIAL FEAST DAY FOR THE PHILIPPINES
Santo Nino
Mark 10:13-16
Ang hulagway sa Santo Nino nga namat-an
nako’g buot mao ang usa ka harianong bata nga may korona sa ulo, nagsul-ob og
sininang pula, ug naghawid sa kalibutan diha sa iyang walang kamot. Apan karong
panahona, aduna nay daghang imahen sa Santo Nino nga atong makita – naay
sundalo, naay mananagat, naay panday, naay doktor, ug daghay pay uban.
Unsa may buot natong isangyaw niining
nagkadaiyang imahen sa Santo Nino?
Kini usa lamang ka pagpakita nga ang
Santo Nino mao gayod ang “Emmanuel” o “Ang Dios nga nakig-uban kanato”. Tungod
sa iyang dakong gugma, nakighiusa siya sa atong nagkadaiyang kahimtang sa
kunabuhi.
Nganong daghan man kanato ang nahigugma
sa Sto. Nino? Unsa may nagdasig kanato sa paghimo ug pagpadayon og debosyon sa
Dios nga bata?
Matag karon ug unya, makadungog kita og
“milagro” nga gihimo sa Santo Nino alang sa mga tawo. Adunay mag-ingon nga
naayo sila sa ilang sakit tungod sa panabang sa Dios nga bata. Gipatong kuno
nila ang imahen sa Santo Nino diha sa parte sa ilang lawas nga nagdaot ug naayo
sila. Aduna usay mag-ingon nga ang Santo Nino maoy ilang tigpanalipod panahon
sa katalagman ug aksidente. Gipaatubang kuno nila ang Santo Nino sa sunog ug
kini maoy nakapalong sa kalayo. Panahon sa dakong huwaw, adunay nagligo sa
imahen sa Santo Nino ug dayon misugod kuno ang pag-ulan.
Usa sa dakong grasya nga nadawat sa mga
Pilipino mao ang gasa sa Kristohanong pagtoo. Apan, importante kaayo nga makita
nato ang dakong kalainan sa tinuod nga pagtoo (genuine faith) ug sa patoo-too
(superstitious belief).
Angay natong sabton nga ang Dios
nagpakahimong bata dili aron nga mosunod Siya sa atong kagustohan kondili aron
nga kita makasunod sa Iyang panig-ingnan.
Niining kapistahan sa Dios nga Bata,
kita gipahinumduman ni Cristo sa pagpabilin nga matuohon ug masaligon sa
panabang sa Dios Amahan, mapaubsanon, masinabtanon, matinabangon ug mapasayloon
sa isigkaingon. Amen… Viva Senor Santo Nino!
God is love...
God bless us always...
